《狂秋日記》第五章

《狂秋日記》第五章・娛樂圈作大活動

入行前聽人講話娛樂圈男盜女娼，入咗行十幾年，見聞都唔算少，其實邊有外人講得咁誇張。啲新聞大多數都係藝人同埋娛媒送出嚟嘅，黑社會、雞、鴨、衰人、擦鞋仔，你話我知邊行冇？空姐又話飛雞，唔通做親空姐都係雞？警隊又話有鴨，唔通全部警察都咁賤？大家知唔知娛樂圈有幾多藝人？出名唔出名計計埋埋有成萬人， 一兩個無恥、貪婪做雞做鴨就唱到好似個個都係。你叫人點尊重我哋呢個行業。

娛樂圈啲宣傳手法一輪輪，不過總括嚟講都冇乜好嘢。不外乎無知、賤格、下流、誇大作嘢。一陣又話興鬧鬼，於是個個見鬼，捉鬼，撞鬼，俾鬼小。一陣被包，於是真包假包叉燒包。真包就係直情包起俾人玩一頭半個月，假包就係搵條佬做男朋友，買車買樓，男朋友幫忙得唔得？吹咩！不過呢種關係通常唔長，最後都係傳出婚訊然後父母反對，分手了之。跟住再搵過另一條水魚，男男女女各得其所，女呢就搵本支票簿，男就當買隻名種狗，得閒帶出街喺啲生意朋友面前威吓，做老婆？咪搞！唔知幾時明星兩個字搞到咁賤，所以大家請自重。

最近汶萊包女事件睇怕又係吹水居多，可能有部份係事實，但係邊有咁誇張，啲女星名單直情暗殺手咁長。傳媒日講夜講，唔關佢事嗰啲二三線姐仔又走出嚟講吓嘢，話自己知道些少內幕都好似好威水咁。冇嘢講呀？冇新聞呀？得閒用吓腦諗下點做好啲戲好過啦，妖人！

*黃秋生著《狂秋日記》散文集第五章