《狂秋日記》第十五章

《狂秋日記》第十五章・奧運大細超

你話奧運傷殘代表隊凱旋返港係咪受到不公平對待呢呵？冇嘢嘅，呢啲就見人見智嘅啫，李麗珊返港咁熱烈咪又係明星效應。有人出嚟講話呢種現象唔健康，立即俾人丙到飛起，差啲要拉去遊街咁滯。咁而家傷殘運動員返港嘅「熱烈」程度有眼你見啦，香港人新屎坑三日香，一切決定於明星效應之下，咁唔知係健康定唔健康呢？我都唔識答嘞。

比起李麗珊返港，政府今次派員去接機就簡單而「隆重」得多嘞。李麗珊就派乜司物長，「劍王」張偉良都係派乜司物長，不過全部都係副嘅。咁又係嘅，傷殘嘛，咪派番啲冇咁健全嘅去囉。又話怕人唔方便所以唔搞盛大歡迎，你老味啦，人哋方便過你呀，你去攞四個金牌睇吓，四乘一百跑五十幾秒，俾多隻腳我跑都跑唔到啦。不過事情又要兩睇，有人話政府之所以唔搞文化中心接受市民歡呼，係因為根本冇乜市民會去歡呼，無謂到時令人難睇啦。咁又講得啱，但係點解市民唔會去歡呼呢？係因為好多人唔知有件咁嘅事吖嘛。點解唔知？係因為電視冇播吖嘛。點解唔播？大概係認為傷殘運動冇商業價值啩？如果真係咁，咁大家就睇得好清楚個真相嘞，所有一切都求諸功利價值，而且仲係未經証實嘅根據。你可以話我都係冇根冇據，既然係咁，四年後唔該大家留意，一於爭取直播埋傷殘運動比賽，睇吓係咪真係冇人睇？到時再攞幾面金牌，睇吓係咪又係冇乜人去接機，冇人歡呼？睇吓政府又會點樣？不過下次還下次，今次嘅事實就係咁。各位傷殘運動健兒，你哋係香港人嘅光榮，歡迎凱旋回港。

*黃秋生著《狂秋日記》散文集第十五章