《狂秋日記》第十一章

《狂秋日記》第十一章・超速人生

呢個世界，靠呃呃騙騙嘅人居多，幾許有真材實學？時代唔同，而家乜嘢都講速成。你睇嗰啲乜嘢速成班，開到通街通巷。老實講，邊有速成呢回事。敎你嗰個呃你，你去學又自己呃自己，學成又係學咗個呃人嘅方法出去呃人。最簡單好似英文咁，語言呢樣嘢三年不為功啦，學完 ABC，再學幾句日常處境對答，咁就叫速成？照板煮碗，一時都止得吓咳嘅。不過遇著一個唔係咁答就死嘲，都唔知點算。可惜世代唔同，而家啲人只求今朝不望明日，仲邊有人肯花心思三五七年去學一樣嘢。

家陣係短暫嘅年代，住屋如是，傢具如是，衣服如是，連感情都如是。大家覺得個世界變得好快，於是自己變得更快。以前啲人住屋講求真材實料，一住入去希望千秋萬世，住到兒孫滿堂。現代家庭解體，仔女大咗就搬開住，一間大廈幾十年就話要拆，如果乜都真材實料，咁啲建築商，地產商食乜？以前一張床瞓三代，而家啲傢具務求做到同時裝一樣， 一季換一次花款，啲料好極有限。上一代著衣服講究質料上乘，而家俾人笑老套。以前白頭到老，而家唔啱就換，費事研究，不許婚姻見白頭。總之我哋命就長咗，唔知點解時間就短咗，乜都要快，要新，要換，於是邊度仲有真材實料，唔呃點算？

*黃秋生著《狂秋日記》散文集第十一章